Entebbe, Uganda – 23 May 2026:- Jaamacadda Ummadda Soomaaliyeed (JUS) ayaa ka qayb gashay aqoon-isweydaarsi laba maalmood socday oo lagu qabtay magaalada Entebbe ee dalka Uganda, kaas oo diiradda lagu saaray hindisaha REFHE-EA (Research Excellence Framework for Higher Education in East Africa) ee lagu horumarinayo tayada, maamulka, iyo hoggaaminta cilmi-baarista ee jaamacadaha Bariga Afrika.
Aqoon-isweydaarsigan ayaa isugu keenay khubaro, cilmi-baarayaal, iyo wakiillo ka socday jaamacadaha iyo hay’adaha tacliinta sare ee dalalka gobolka, kuwaas oo ka wada hadlay hababka lagu xoojin karo tayada cilmi-baarista, iskaashiga aqooneed, iyo horumarinta qaab-dhismeedka hay’adaha tacliinta sare.
Intii uu kulanku socday, waxaa si gaar ah diiradda loo saaray muhiimadda ay leedahay dhisidda nidaamyo waxtar leh oo lagu taageero cilmi-baarista, kor u qaadidda tayada wax-soo-saarka aqooneed, iyo xoojinta wada-shaqeynta ka dhexeysa jaamacadaha Bariga Afrika si loo wajaho caqabadaha iyo fursadaha ka jira dhinaca waxbarashada sare.
Jaamacadda Ummadda Soomaaliyeed waxaa kulanka ku metelay Madaxa Cilmi-baarista Jaamacadda, Mudane Axmed Cabdinaasir Cabdulle, kaas oo ka qayb qaatay doodaha iyo is-weydaarsiga khibradaha la xiriira horumarinta cilmi-baarista iyo maamulka aqoonta ee jaamacadaha gobolka.
Ka qaybgalka Jaamacadda Ummadda Soomaaliyeed ee madashan aqooneed ayaa muujinaya dadaallada joogtada ah ee Jaamacaddu ugu jirto horumarinta cilmi-baarista, tayeynta waxbarashada sare, iyo dhisidda iskaashi tacliimeed oo heer gobol iyo heer caalami ah.
Jaamacaddu waxay sii waddaa dadaalladeeda ku aaddan kobcinta dhaqanka cilmi-baarista, horumarinta awoodda aqoonyahannada Soomaaliyeed, iyo ka qayb qaadashada hindisayaasha gobolka ee lagu xoojinayo tayada iyo saamaynta waxbarashada sare.
