Muqdisho, 24 May 2026 :- Jaamacadda Ummadda Soomaaliyeed (JUS), gaar ahaan Kulliyadda Culuumta Bulshada, ayaa maanta martigelisay kulan-cilmiyeed muhiim ah oo uu jeediyay Danjiraha Dowladda Shiinaha ee Soomaaliya, Mudane Wang Yu, kaas oo diiradda lagu saaray kobcinta wacyiga bulshada iyo muhiimadda ay leedahay ilaalinta wadajirka ummadda.
Kulanka ayaa waxaa ka qayb galay maamulka Jaamacadda, macallimiin, arday, iyo marti sharaf kale, iyadoo Danjiruhu uu soo bandhigay aragtiyo ku saabsan doorka ay bulshada, gaar ahaan dhallinyarada iyo aqoonyahannadu, ku leeyihiin ilaalinta qiyamka mideeya bulshada iyo xoojinta midnimada qaranka.
Danjire Wang Yu ayaa carrabka ku adkeeyay muhiimadda ay leedahay dhowrista taariikhda, dhaqanka, iyo qiyamka wadajirka bulshada, isagoo xusay in arrimahaasi ay saldhig u yihiin xasilloonida, horumarka, iyo mustaqbalka ummadaha. Wuxuu sidoo kale tilmaamay doorka waxbarashadu ku leedahay kobcinta wacyiga bulshada iyo dhismaha jiil awood u leh inuu ka shaqeeyo horumarka dalka.
Dhinaca kale, Danjiruhu wuxuu ka hadlay muhiimadda iskaashiga caalamiga ah iyo sida uu uga qayb qaadan karo horumarinta waxbarashada, kobcinta aqoonta, iyo xoojinta xiriirka saaxiibtinimo ee u dhexeeya dalalka iyo bulshooyinka kala duwan.
Madasha ayaa ahayd mid is-dhaafsi aqooneed oo miro dhal ah, waxaana ardayda Jaamacadda Ummadda Soomaaliyeed ay fursad u heleen inay su’aalo iyo fikrado la wadaagaan Danjiraha. Doodaha ayaa diiradda lagu saaray xiriirka Soomaaliya iyo Shiinaha, horumarinta waxbarashada, fursadaha iskaashiga tacliimeed, iyo kaalinta dhallinyarada ee ilaalinta midnimada iyo horumarka bulshada.
Jaamacadda Ummadda Soomaaliyeed waxay sii waddaa qabashada iyo dhiirrigelinta madalaha aqooneed ee noocan oo kale ah, kuwaas oo gacan ka geysta kobcinta aqoonta, wacyiga bulshada, iyo is-dhaafsiga fikradaha wax ku oolka ah ee taageera horumarka dalka iyo bulshada Soomaaliyeed.
